Bismillah...

 Diajar nyerat Fiksimini Basa Sunda : Neni Geo Albanjari

Fikmin # piit ngeundeuk ngeundeuk kiara #
Rahayat jojorowokan nepi ka jerit jempling, hayang diaku ku DPR, teu dienge samenel ge. Atuh rahayat lalimbung ngemu kabingung, nanahaon atuh ari DPR teh? Pananya nu sarupa minuhan hate rahayat.

Fikmin # pucuk seuneu #
Seuneu nu ngabebela dina panungtungan peuting, nyaksrak panasna kana sakujur awak, letahna ngalentaban kana hate nu geus diceboran ku tugenah. Angin peuting nu ngagelebug teu mampuh mepeskeun ruhay nu nyaliara na badan, cai laut nu tingjelegur teu bisa niiskeun pikir nu geus katiir jalir. Manehna Anteng na pucuk seuneu, silalatuan, ngadago luang, ngadodoho waktu. Sret, pucuk seuneu ku manehna dirobah jadi hinis dengdem nu terus bayangan ngarencah hate manehna, diturihan, disesebet, disiksik tuluy diawurkeun ka palebah bebenena nu keur oleng panganten.

 

Fikmin # Apet #

Manehna kawentar jalma ludeungan. Peuting ieu teh malem jumaah kaliwon, jam hiji kakara balik ti imah babaturanna, meh teu jauh teuing, ngahaja jalan norobos nu ngaliwatan dapuran awi jeung makam. "Kang Ubed ngiring..." werrrr.....aya sora awewe ngagentraan ngaranna dibarengan jeung seahna angin, reg manehna ngarandeg, luak lieuk, breh belah kencaeunana aya awewe geulis keur diuk dina bangku handapeun tangkal buah. Teu nembal, manehna ngagancangan leumpangna, palebah pengkolan, " Kang Ubed...ngiriiing...!", manehna ngaranjug hareupeunna aya deui jirim awewe, ngan wajahna robah robah pikasieuneun, ngadenge deui ngagero, teu ditolih, beuki gancang sukuna ngalengkah, " Kang Ubeeeedddd...ngiriiiiinngg....!!?. Geleber sora nu hiber, bleg...wwuuuusssss...woorrrr.... Geuwat babacaan teh ditarikeun ayeuna mah, "Hheuh...hheuh...karasa ceulina panas ku napas nu sakitu nompona." Kang Ubed....abdi hoyong ngiring Kang...", sora awewe nu ngirung haroshos pipireun ceulina," Tobatttt... hampun...hulah ganggu dewek, milu ngaliwat hungkul", nahap nahapkeun manehna cacarita. "hheuhh...heuhh...han abdi ge ju ngantosan nu ngaliwat, meh aya batur uih Kang" ceuk eta sora awewe ditukangeunnana. Soak hate manehna, amprok jeung dituturkeun mah. Belenyeng manehna lumpat sakalumpat lampit, " Hihihihihihihi..... hihihihihi..... sora nu ngahihih teh nuturkeun luhureunnana. Geus nepi ka lemburna, manehna teu eureun lumpat, laju muru imahna. Nepi kana panto imahna teh, tuluy gegedor jeung gogorowokan, " Maa Bukaaa...Maaa...Maaa...bukaaaa", kulutrak panto muka, " Kang Ubed... abdi pan hoyong ngiriiiing..." Jirim awewe nu nuturkeun teh, ngabageakeun manehna di imahna.

Fikmin # takdir #

Anjeun jeung kuring ngarumat duriat sina pageuh, nguntun asih beuki masket. Datang takdir nu teu kudu seseleke nerapkeun kahayangna. " Pileuleuyan enung, geuning jodo akang sobat anjeun, hampura..."

16 Januari pukul 14:44

# Mapag Taun Anyar #

oleh Neni Geo Albanjari 

Basa manehna ngagugulung fikmin, karasa sirahna puyeng jeung lieur. Pangpangna sanggeus macaan fikmin beunang nu sejen. Leng...leng...bumi alam teh muter ngurilingan manehna." Ampuuunnn...meunggeus atuh nguirna pan uing teu kuat", bari sagala dirawel sugan bisa dipake cecepengan, manehna tamada kanu nguir nu teu daek eureun. Manehna ngudupruk teu walakaya, bumi alam lalaunan sareh, cekat cekit...reg eureun. Manehna masih ngararasakeun," Euh geus eureun geuning," tuluy dangdak dengdek bari ngoclak ngoclek sirahna. Guligah teh teu lila, lieur teh datang deui leuwih tinu tadi, manehna heran," Naha kunaon ieu teh, pan  bumi alam mah itu keur anteng". Leng...leng...leng...asa nureleng kabungbulengan. Panasaran bari nahan tunggara ge manehna ngahontal sirahna, kerewek kana sirah nu oglak oglek, rurusuhan muka otak jeung pipikiranana," Aaghhhh...", maneh nepika jumarigjeg, reuwas lain dikieuna, eusi otakna geueuman ku petengna bangbaluh dunya  " Ampuuunn... Gustiiii... ", bari lumengis nalangsa. Lalaunan manehna nyengkatkeun sirahna, karasa aya nu haneut kana hatena, tanggah ngemu harepan, cle sukuna niti hambalan harepan, bray panto taun anyar muka," Gustiiii...abdi ngadeuheus ka salira".

Taun anyar, 1 Muharam 1433 H
malem ahad, 26 November 2011

Peuheur

oleh Neni Geo Albanjari pada 18 November 2011 pukul 20:03

Ningal budak nu ceurik nginghak bangun tugenah bet meni karasa nyentugna kana jajantung. Budak teh kapanggih ku babaturanana keur ngagurat gurat leungeunna ku silet, sanggeus beres diubaran di UKS,  dipanggil ka rohangan BP
."Kunaon atuh pangna hidep ngalakukeun kitu?" budak teh ukur gideug jeung gideug we, teu ieuh nembalan kalah nginghakna beuki kerep.
" Geus atuh ayeuna mah ibu titip saur ka sepuh hidep, eta mah bade mamah atawa bapa, diantos enjing jam 8 di sakola..." , teu kebat, budak kaburu nginghak," Mamahna ge teu aya... nuju ka Bandung,"
" Bapa mah aya pan?"
" Sami teu aya...nuju angkat sareng istrina... hiks...hiks...",  budak teh ngadingdiut ceurik eueuriheun.
Kuring nu teu payaan mun aya nu sedih, cimata nu tatadi ngembeng, langsung ngalembereh, duh geuningan lalakonna asa jauh tina sawangan, nu kuduna endah geuning peuheur.  Di juru rohangan, kuring  nginghak hujan cimata getih...peurih, langit ge milu angkeub kulawu, kudu kumaha pilampaheun pan kuring rek jadi nu kadua  ...asa teu wasa...


Fikmin # boa boa #
Hatè mah ngajerit, sadar,yèn pacabakan tèh dilarang ku agama jeung hukum, lain rampok komo koruptor, tapi saukur pelantara...gerentes hate ngomong sorangan.
'' Kumaha kang, tos aya ? " sora lalaki nu meujeuhna disebut aki-aki, muyarkeun lamunan kuring.
''Parantos..budakna tos aya dikamar no 207..''
'' Nuhun kang, yeuh jang udud..." kituna tèh bari ngusiweulkeun duit 50rebuan dua lambar kana saku kuring.
Tah èta pacabakan kuring, nu geus dilakonan mangtaun-taun, nepika boga budak awewe, parawan umur 16 taunan.
Gebeg....reuwas, barang ningali budak awèwè nu dibikeun tèh dedeganna sarua jeung budak kuring, sarua di seragam sakola kènèh. Beungeut pias, ras inget ka budak sorangan, '' boa-boa..."

Karya: Rudya Kuz

Banjar, senen, 30 Januari 2012

  Fikmin," Hanjelu"

'' jadikeun waè kitu ?'' gerentes hatè kuring nanya sorangan.tekad geus buleud.keteyep kuring kaimah mitoha,sup ka kamarna.nyampak mitoha sarè tibra naker,dibarung ku hujan gedè diluar.rekét panto lomari dibuka,sakilat bungkusan kèrèsèk nu jero na duit,ku kuring dicokot,leungit ditelen ku poèkna peuting.
Rebun rebun kuring geus kaluar ti imah,pamajikan nanya gè teu ditolih,maksud rèk ngampihkeun duit hasil tadi peuting,panon lulungu,pangacian can kumpul teu dipalirè.sorodot..! gujubar kuring labuh ka sisi wahangan,plung bungkusan murag kabawa palid caah ,balas hujan tadi peuting.kokosèhan kuring nèangan.lebeng teu kapanggih.antukna kuring balik deui ka imah.dug sarè.
Hawar hawar kadèngè aya nu uluk salam..tuluy nyarita semu dumareda.
'' nyai,hampura abah jeung ambu,duit ladang buburuh tani,menang 3 bulan,tadi peuting aya nu maling,mangka èta duit ngahaja jang sakola anak manèh jaga ka SMP '' Segruk kolot,budak jeng incu careurik.
Bumi asa muih,langit asa runtuh.hanjelu kacida.nyeuri taya papadana,kuring ngahèphèp mèh kapiuhan...

karya : Rudya Kuz

Selasa, 31 Januari 2012

Fikmin # Bati Ngaronda #
Peuting ieu, Juhe jeung Ongki ngurilingan lemburna keur ngaronda. Di deukeut hiji imah, nenggang tinu sejen, maranehna ngarandeg, " Duh, asa sono kanu geulis!",
ceuk Juhe," keur aya di dieu jigana mah!"."Enya, tadi sore kaciri
mobilna aya liwat", walon Ongki.
"Yuk, ah! Urang tempo sakeudeung, sugan we aya milik, bisa neuteup nu geulis!", ceuk Juhe, bari sukuna mah geus ngalengkah ngadeketan imahna , Ongki nuturkeun bari semu luak lieuk ngarasa keueung , tara tara ti sasari.
Geus rada deukeut, duanana tingketeyep kana jandela, nu hordengna can nutup, jadi eces ka jero imah. Nu geulis teh keur paduduaan, jeung jajaka tegep, sembada. Juhe ngageremet, Ongki mah jongjon nempokeun nu keur nyacapkeun asih, ngabudalkeun asmara. Silih usap rema, silih keletan, si jajaka geus teu sabar, merenahkeun diri, ngalageday na sofa empuk. Tuluy nangkeup nu geulis, beuki papukeut,” Aaaarrggghhhhh….”, jajaka ngajerit, nyiksik jempling, tuluy kokolojotan, awakna kaciri meotan, beuki peot, saacan bahamna leupas tina baham nu geulis, si jajaka ngaleupaskeun nyawana, dina kaayaan waruga pikawatireun, garing. Juhe jeung Ongki ngayekyek, tuluy kapiuhan.

Banjar, selasa, 13 maret 2012