sajak sunda

Kumpulan sajak sajak Neni Geo Albanjari

duh...!!?

oleh Neni Geo Albanjari pada 24 November 2011 pukul 20:26

asa langki salira imut nu ngirut
disarengan ku teuteupan nu liuh
kasaha imut salira dibaledogkeun?

galindeng tresna natrat na soca salira
hariring asih lumirih na geterna soara
kasaha salira  nyampaykeun deudeuh?

Salira

oleh Neni Geo Albanjari · 15 Januari 2012

Salira
nu ngagentra dina simpe
nu galecok teu jeung moyok
nu ngageuing sangkan eling

Salira
batur diskusi...
sobat...
kadang beda pamadegan
kadang sarua egois
kadang silih geuing silih elehan

Salira
ukur kalangkang sakolepatan
ngarobih diri janten warna katumbiri
nuhun... gerentes hate kebek ku tumarima

Banjar, Minggu 15 Januari 2012

Bismillah...

oleh Neni Geo Albanjari pada 5 Desember 2011 pukul 19:44

Bismillah....
hambalan poe teu weleh nganti
teu nolih hoream disorang ku harepan
langit bulao mayungan ku guligah rasa
langit kulawu angkeub ku lalangse lara

hambalan poe teu weleh surti
mapag sagala rasa rumasa
dumalit dina sagara asih Mantenna
gumulung jeung  kaheman Anjeunna

Bismillah...
nincak hambalan hate teu weleh pasrah
tiap lengkah ngancikeun harepan
ngawelah kahirupan na ridho Alloh SWT

senen, 9 muharam 1433 H

Rasa ti salira

oleh Neni Geo Albanjari pada 6 Januari 2012 pukul 19:21

Rasa ti salira mapaesan lalangit kalbu, dipulas  bulao ngaligarkeun asih na weningna ati
dirumat ku rema kaheman ngagolontorkeun katresna nu ngagulidag

Rasa ti salira ningkeuran hate ku simpay kadeudeuh, dipiguraan ku kuwung kuwung kasono
diuntun ku salempay kamelang dina pasini nu nganti wanci

Rasa ti salira nyumiratkeun gumiwangna cahya harepan, lir lampion pusaka ratuning rasa
dipulasara ku hibarna kanyaah nyumanding na geleterna cinta nu rosa

Rasa ti salira nyaliara teu kawawa na mayakpakna bodasna asih sumeleke na dasar hate
 dipupusti ku rasa rumasa, ngabagjaan  raga sukma mugurkeun kamangmang


jumat peuting, 6 januari 2012
Banjar kenangan

"katiga"

oleh Neni Geo Albanjari pada 29 September 2011 pukul 11:13

wanci beurang nu ngarangrangan
ngahegak nanjak ka manceran
ngarangsadan ku kesang kamelang
bayeungyang...
katiga nu ngajega
handaruan bayu karingrang
mitapak na lemah kameumeut
hariwang...

290911
nu sono kana hujan

sa

oleh Neni Geo Albanjari pada 14 November 2011 pukul 17:36

sajak kuring

dangiang peuting nu ngembat kasono
mukahkeun ajen nu ngancik na diri
kasarad ku motahna kageugeut
kajiret ku teuteup salira

peuting jeung hujan ngahucuhkeun
temah wadi geus karumpak
geusan nyorang ngangkleungna rasa
nu nyamuni dina deudeuh

diedit ku salira

kasono ngembat na dangiang peteng peuting
mukahkeun ajen nu ngancikan diri ngajengjen lali
kararad kasered ku geugeut motah
kabeungkeut kajiret ku teuteup mijah

hambalan jeung hujan ngahucuhkeun
temah wadi karumpak kawani
ngangkleungan rasa
nyorang asmara boraah risi
na deudeuh nu nyamuni


@Jazzakallohu khoiron katsiron Kang...

sawarna

oleh Neni Geo Albanjari pada 14 Oktober 2011 pukul 0:43

beureum, na beureum anjeun motah
marengan katresna nu kabungbulengan

beureum, na beureum anjeun jumerit
ngudag mesatna asih nu mumbul ka alak paul

beureum, na beureum anjeun tumanya
ngojayan hariwang na sagara mangmang

beureum, na beureum anjeun tibelat
mudalkeun  kasono nu leber na rohang simpe

beureum, na beureum anjeun lumengis
nganteur jerona kapeurih na leuwi tunggara

 
kanggo salira nu salin jinis
kemis tengah peuting,13102011


Sajarah urang duaan                                                      - dalit -

tepung munggaran 7 taun katukang
harita kuring ngaliwat palebah dinya
waktu anjeun mimiti narik ati kuring
teu sirikna unggal poe dilindeukan
micangcam anjeun
hiji waktu hate ngajenghok anjeun teu nampeu
disusud ka unggal tempat
nyusud lacak anjeun nepi ka jauhna...
poe kadua, aya kelemeng raratan anjeun
tepung deui rasa bagja minuhan hate
katarik ati ku dedeg pangadeg jeung rupa hade
pasini ngajadi, anjeun  milik kuring

ngamimitian bareng  aga eugeu asa asa
menang saminggu urang mimiti wanoh
kabiasaan, kahayang, keresep urang duaan
ku basajanna anjeun...jeung ngartina kuring
ti harita urang jadi dalit teu beunang dipisahkeun
sasat gegentetan reureujeungan
nu lian geus pada nganyahokeun
anjeun nu kuring, kuring nu anjeun
teu wasa ngalangeu nyorangan
teu werat papisah jeung anjeun

babarengan salila tujuh taun, endah...
ku ayana anjeun, duduluran jeung nu lian beuki rakeut
sosobatab jeung nu jauh beuki pageuh
kuring beuki kapigandrung
teu sirikna diteuteup diusap
geus puguh dikeukeuweuk jeung dikeukeup mah
tapi takdir teu bisa dipungkir
aya waktuna patepung
aya waktuna papisah
nepi hiji waktu, anjeun miang teu pamitan
hate hanjelu, nganaha naha
keclakna cipanon nu ngamalir teu karasa
nganteur kuring istigfar
nampi kana takdir kalayan ikhlas
ngikhlaskeun anjeun, henpon kameumeut, dirawatan kunu sejen

jumaah, Romadhon
12 Agustus 2011

sajak ti salira ( kenangan nu moal dipopohokeun )

oleh Neni Geo Albanjari pada 22 Juli 2011 pukul 17:30

>>Beurat

rasa kuring ka salira sanes reumis janari..
Nyulusup dina kalbu saban waktu..
Sumarambah kana bayah tiap mangsa..
Matri kana ati tiap wanci..

Salira ibarat kembang,
nu mangkak ka sorenakeun..
Tapi najan kitu..
Seungitna nyambuang ka madhab papat..
Narik kumbang pikeun datang..

Ti kajauhan kuring nyawang..
Rasa nu pinuh kamelang..
Mangsa salira meh aya nu ngadongkang..
Kuring manggih jalan pasampangan..
Antara gumbira sareng hariwang..